Gründigsgschicht

 

 

Joor
2010

Alles het emool im Joor 2010 agfange.  Drey Dambuure vo dr VKB hän sich spontan am Fasnachtszyschtig droffe zem durch d Gasse rötze.

2011

Do die sich dänggt hän, dass das garnid mol so schlächt deent het, isch das im Joor druff vo deene drey widrholt worde. Durch s Joor dure het me sich in dr VKB umghört und no e baar rötzer meeh könne zem Fasnachtszyschtigsrötzerzyygli hoole.

2012

So isch denn die Hampfle vo Dambuure und eme Vorträbler, alli im Charivari, den an dä Zyschtig gange, hän bis in frieh Moorge drummlet und dört isch au s erste Fasnachtszyschtig- Fäähriständeli entstande. Me het sich nach däre Fasnacht dänggt, s wär aigentlig no gail e richtigi Fasnachtszyschtigs- Dambuuregrubbe z gründe mit ainhaitligem Koschtym, emne Name, viel iebe und allem drum und dra. Vomene Mitglied isch denn, nach vielene sinnlose Idee, e guete Koschtymvorschlag ko und dä isch aistimmig akzeptiert worde. Guet, mit em iebe hets halt nit eso klappt, aber drfür hän sie e Koschtym ka.

2013

Dr richtig Stress isch denn ko, wos drum gange isch e träffende Name z finde. Nach stundelange Diskussione und unzählige Idee isch ändlig e ängeri Uswahl troffe worde. Me het sich den schlussändlig und wie ihr Euch das könnet dängge für d‘ Fummler entschiide.

Eso het den die erst offiziell Fummler- Fasnacht im 2013 stattgfunde.

 

 

Und so rötze d‘ Fummler au hytt no am Fasnachtszyschtig bis am Moorge frieh durch d Basler Gasse.

Advertisements