Fasnachtsbricht 2015

IMG_5485

 

Dä Joorgang isch vo vyylne Absänze und Abgäng präggd worde.

 

Drey „Fummler“ hän ys im 2014 mehr oder weniger mitteilt, dass sie nym zu uns wänn gheere. Meh gits do drzue nyt z saage.

Laider sinn au glichzitig vier Schweschtere im Militärdienst, wo ain drvo sich het könne befreie, zem gliich könne am Zyschtig drbi z sii.

Drzue kunnt no, dass unseri lieblings Zwilling us Karrieregründ nid hän könne drbi sii.

Zem Glygg hets kurzfrischtig no e Zuewaggs vomene Familiemitglied vo aim vo dene drey Militärschweschtere gä.

Also hets denn am schluss doch no zu drey Dambuure und zwai Vorträbler glänggt.

 

Am Fasnachtszyschtig hän sich vier Nonne im Claragrabe troffe und sich ahgleggt. D Latärne, s Requisit und d Drummle sinn parat gsi zem uf d Gass go. Am 6 ab Ains hämmer ys denn am Claraplatz mit dr fünfte Schweschter troffe.

Bim erschde Halt hets den DR Kommentar vo dr Fasnacht 2015 gä; Sin dir nid emol mee gsi? (und das isch definitiv nit s ainzig mol gsi wo mir das gheert hän)

Am halbi vieri hämmer ys mit dr Alte Garde vo dr VKB zem traditionelle Fasnachtszyschtigsriehme troffe. Will das so grötzt het hän mir no e baar Riehme draa ghänggd.

Laider hän unseri zwai Vorträbler uns miesse verloo und dorum het d Latärne und s Requisit zrugg ins Glaibasel miesse.

Au in dämm Joor sin mir mit dr Fäähri gfahre, s Ständeli hämmer usgloo, drfür het d Latärne schöön über dr Rhyy glüchtet.

Nach eme kurze Halt im Claragrabe ischs in Restaurant Hahn gange zem dinniere.

Gsterggt und voller Tatedrang hets ys widr ins Grossbasel zooge, do mr ys mit ere andere Zyschtigsdrubbe (mit pfyffer) verabreedet hän.

Do mr das garnid mol so luschdig gfund hän, hän mr ys nach 1-2 Riehme widr abgspalte und sin zem Schluss no zu dritt durch d Gasse stolziert.

Nach eme Halt bym Bruune Mutz hän mir ys entschiide Faadegrad über dr Seibi z drummle und sinn den schlussändlig bim Minschter aako.

Mir hän ys ufteilt und sin drummelnd um die viele Latärne gloffe. (Mi persönliche Höhepunggt vo dr gsamte Fasnacht!)

Unde an dr Schiffländi aako hän mir e alte Bekannte us dr VKB aatroffe, wo laider nym so früsch unterwäggs gsi isch. Mr hän ihm uf dr Suechi nach syyne Zyschtigslyt nit könne hälfe.

Ab zem letschte Halt in Stadtkäller ischs gange. Mr hän uns drno entschide langsam widr ins Glaibasel z go und hän dä Daag mitme gmietlige Schlussriehme über die mittleri Brugg usklinge loo.

Die eint Schweschter het sich am Claraplatz verabschiedet. Jetzt sins nur no zwai Nonne gsi, wo sich dänggt hän, dass me au logger no bis vor d Huustür im Claragrabe ka drummle und das hän sie au gmacht. (04:20)

 

So ändet au dä Fasnachtszyschtig 2015 viel z schnäll, aber dr nägschd kunnt jo scho bald widr. (16. Hornig 2016)

 

IMG_5480Photene Fasnacht 2015

Advertisements