Vor-/Fasnachtsbricht 2016

10633484_10208897710626303_3913499652068638482_o

Anderschd als jedi vorhärigi Fasnacht het die bereits e Wuche nach dr letschde aagfange.

Zmindescht was d Vorbereitig aagoht -Dorum do no e glaine Input.

Y ha nach däre doch lausige Fasnacht im 2015 (zahlemässig), d Fasnacht 2016 zur beschde Fummler Fasnacht bis dato welle organisiere. Vor allem zem de alde usträtene Mitglyder zeige, was mr au ohni sie uf d Bei könne schdelle.

Drum hanni mini Idee-e frieh zämmedoo und die an dr GV im Summer de andere Fummler priisgää.

Do alli yyverstande gsi sin hanni mi ans Sueche und Bschdelle gmacht.

Ich bzw. Mir hän unbedingt e gschniiderets Koschtym welle, do s alte jede Pfluderi het kenne kaufe. Scheene Stoff mit suubere Details, was das Koschtym ainzigartig und schbeziell sott mache. E Schniider isch schnäll gfunde worde und dä het das guet gmacht!

Passend zem Koschtym und will die Trainerhose oder gar Jeans underem alde Koschtym useblitzt hän und will Waggissogge öbis für Waggis sinn, hanni nacheme super Tipp die perfeggte Sogge für ys gfunde – Violetti Sogge diräggt us em Vatikaan und schiins us em gliiche Laade wo si au dr Paapschd hoolt. (Gammarelli) – Gail!

Was d Requisite aagoht hämmer eigentlig scho einiges ka, aber das längt nid! 🙂

Weihrauch inkl. Weihrauchfass muessi sii – hets ghaisse. Isch bschdellt worde – Top!

E Wäägeli fyr – sage mr mol – Flüssiginahrig. Isch bschdellt und bearbeitet worde – Hammer!

Und z letschd, dass mr uns in dr Stadt nit vergisst – Stigger und Badges mit unserem Logo druff – Nice!

SO und jetzt zem aigentligge Fasnachtsbricht 2016!

IMG_8295

An däm Fasnachtszyschtig hän sich acht Nonne im Claragrabe droffe zem sich ahleege und d Requisite zem offizielle Träffpunggd z bringe. Mit ere glaine Verspöötig (13:21 – sorry) hämmer ys denn bim Hotel Drey Keenig mit de andere Schweschdere und em Fotograf droffe.

Nach em Grubbefoti ischs den zem erschde Mol uf d Strooss gange.

Bim Hotel Basel hämmer ys mit dr alte Garde vo dr VKB zem traditionelle Fasnachtszyschtigsriehme troffe. Deert isch unser Weihrauch e erschds Mol zem Yysatz ko und s hed grad alli Bligg und Naase uf uns zooge.

Im Lälle Keenig hets e Göttihalt gää. Drnoo sin mr ins Glaibasel, wo die alti Garde e Ständeli plaant gha het.

Mr sin vo dört widr ellai witter gloffe. D Zyt isch aimol mee viel z schnäll voraa gange.

Schnäll ischs dunggel worde und bald emool ischs Zyt für s Z’Nacht gsi. Also sin mr ganz traditionell mit dr Fäähri ins Glaibasel zrugg. E tolle Schwumm mit luschdige Passagier.

Gsterggt und voller Tatedrang hets ys widr ins Grossbasel zooge, do mr mit ere andere Drummelgrubbe e Riehme hän welle mache, was aber erst ganz schpoot z stand koo isch.

Langsam aber sicher sin d Nonne mied worde und e baar devo hets ins Näschd triibe.

Die verbliibene Schweschdere sinn mit dere Drummelgrubbe witter durch d Gasse stolziert. Langsam ischs doch schpoot worde und ai neyeri tradition isch no uf em Plan gschtande.

Alles uffs Wäägeli paggd ischs richtig Minschter gange. Do das im letschde Joor eso iigfahre het isch das e Muess gsi.

Mir hän ys wiidr ufteilt und sin drummelnd um die viele Latärne gloffe – HAMMER!

IMG_8307

An dr Schiffländi aako hän mir ys entschiide ganz gmietlig über die mittleri Brugg wiidr in Claragrabe z laufe. (ca. 04:25)

So ändet au dä Fasnachtszyschtig 2016 viel z schnäll, aber dr nägschd kunnt jo scho bald widr. (07. Meerz 2017)

 

Photene Fasnacht 2016

Filmli Fasnacht 2016

 

Advertisements